Newyddion

Hwyl yn y Parc, Parc Penlan 19 Mehefin 2010 - Y Dydd Mewn Darluniau

Blog y Maer - Cyng Charlotte Leadbeater
14 Mai i 23 Awst 2009 (adnewyddwyd 3 Medi 2009)

Jas yn y Parc - Medi 19 2009

Am ychydig oriau yn gynnar gyda’r nos ddydd Sadwrn 19 Medi, daeth dros 200 o bobl i fwynhau swn y Memphis 7 Jazz Band yn amgylchedd prydferth Parc Penlan, Llandeilo. Roedd y Maer yno i gyfarch pawb yn unigol a chytunodd pawb fod y digwyddiad yn llwyddiant mawr ac y byddai croeso cynnes i fwy o gyngherddau. Rhaid diolch yn arbennig i’r tîm cyfan a helpodd i drefnu’r digwyddiad.

Cystadleuaeth Pentref y Flwyddyn

Mae Llandeilo drwodd i rownd derfynol Cystadleuaeth Pentref y Flwyddyn Calor ar gyfer rhanbarth Canolbarth a Gorllewin Cymru. Bydd beirniaid yn ymweld â Llandeilo yn gynnar ym mis Gorffennaf i weld drostynt eu hunain pam ei fod yn lle arbennig i fyw a gweithio. Mae’r Cynghorwyr Tref Ros Bellamy a Fran Murphy yn edrych ymlaen at y cyfle i dynnu sylw at eu cymuned. “Rydym wrth ein boddau i gyrraedd cyn belled â hyn,” medden nhw, “gan mai dyma’r tro cyntaf i Landeilo gystadlu yn y gystadleuaeth. Mae’n lle rhyfeddol ag ysbryd cymuned arbennig ac ansawdd bywyd ardderchog, felly fe fydd yn wych i Landeilo gael cydnabyddiaeth genedlaethol.” Mae’r beirniaid yn edrych ar bedwar categori - cymuned, busnes, cynaliadwyedd a chyfathrebu, ac maen nhw eisiau gweld sut mae Llandeilo wedi ymateb i unrhyw heriau trwy gydweithio yn y gymuned. Mae Llandeilo yn cystadlu yn erbyn Llanwrtyd a Threfyclo am y wobr ranbarthol o £2000 a’r cyfle i fynd ymlaen i rownd derfynol Cymru gyfan. Wedi ei noddi gan Calor, cefnogir y gystadleuaeth hefyd gan nifer o sefydliadau gan gynnwys Ymgyrch Diogelu Cymru Wledig ac Un Llais Cymru.

Miri yn y Parc – Parc Penlan 20 Mehefin 2009
Dyfyniad gan y Cynghorydd Sir Ieuan Jones o gân yr arferai plant ysgol ei chanu am brydferthwch Parc Penlan a’r ardal:

‘Slowly the evening sun is setting
O'er the banks of Penlan Park
Showing all the land with beauty
O'er Llandeilo and Ffairfach’

Roedd hwn yn ddiwrnod allan arbennig yn Llandeilo wrth i ni fwynhau’r baneri, samplu’r nwyddau a rhyfeddu at ffenestri’r siopau a chymryd rhan yn ein ‘Miri yn y Parc’, Noson Ganol Haf, Mehefin 20, ac arhosodd y tywydd yn sych!!

Dechreuodd y digwyddiad hudolus hwn, a oedd yn rhad ac am ddim, gydag adrodd storïau i blant yng nghanol Llandeilo. Y storïwr oedd John Bilsborough a eisteddodd yn y gadair adrodd storïau arbennig a gafodd ei gwneud gan Jonathan Garrard. Wedi hynny, cafwyd gorymdaith Fawr o Heol y Brenin dan arweiniad Cyhoeddwr Llanymddyfri, Joe Beard a’i wraig Sandra, pwysigion dewr y dref a phlant mewn gwisgoedd canoloesol anhygoel. Fe wnaeth Guy Smith hefyd jyglo’n fedrus i ni cyn ei weithdy sgiliau syrcas.

Roedd Band Arian Porth Tywyn yn chwythu’n dda ac yn dod â safon arbennig i’r digwyddiad. Daeth yr holl siopwyr allan i’n hannog a’n cefnogi hefyd.

Agorwyd ‘Miri yn y Parc’ gan Elinor Jones, y cyflwynydd adnabyddus ar S4C, ac adroddodd rai dyfyniadau doniol dros ben am y parti cyntaf yn y parc gan y diweddar Arglwydd Dinefwr.

Dyfarnodd y gwobrau am y gwisgoedd canoloesol gorau - gwobr 1af, Coblynnod a Thylwyth Teg, ‘Bizzy Bees’; 2il wobr, ‘Midsummer Night’s Dream’, Guides a Brownies; 3ydd wobr, Ceffylau a Marchogwyr, Morgan Williams a Llewellyn Davies.

Gwobr unigol - Ffion Davies a oedd yn edrych yn hyfryd mewn gwimpl rhuddgoch a ffrog goch.

Enillwyd y gystadleuaeth ffenestr gan In Stitches, sef siop sy’n cael ei chadw gan Ann Loynton a Ailsa Proctor, a wnaeth waith arbennig fel arfer trwy wau byddin o lygod, ynghyd â chastell. Reepicheep yn ei ôl!

Ym Mharc Penlan roedd wal ddringo a gweithdy sgiliau syrcas yn rhad ac am ddim. Roedd hefyd arddangosfa ynglyn â 150 mlynedd o hanes y dref dan ofal Cyngor Tref Llandeilo a pherfformiodd St Teilo Singers a Chôr Saint Teilo yn hyfryd yn y Saesneg a’r Gymraeg dan arweiniad Richard Whitehead ac Owain Gruffydd. Fe wnaeth Band Samba Ysgol Gynradd Llandeilo wefreiddio’r gynulleidfa a bu perfformiad bale aruchel gan Ysgol Bale Clasurol Moya Vahey o’r Bont-faen. Dyma’r tro cyntaf i fale gael ei berfformio yma yn y Parc.

Roedd reidiau ffair a theganau gwynt ar gyfer pob oedran; person dweud ffortiwn yn dweud rwnau (digwyddiadau pwysig iawn i’r dirprwy faer(!)) yn ogystal â the hufen blasus yng ngofal Tenovus, hufen iâ a stondinau er mwyn codi proffiliau Sefydliadau Dinesig.

Cododd y casgliad bwced ar gyfer elusennau’r Maer, a oedd yng ngofal disgyblion Ysgol Tre-gib, dros £130.

Cododd y stondinau eraill rhwng £60 a £70 ar gyfer elusennau.

Cafodd y digwyddiad parc hwn ei gefnogi a’i noddi gan Gyngor Sir Gâr a Chyngor Tref Llandeilo. Mae Maer Llandeilo Charlotte Leadbeater yn dymuno diolch i Huw Parsons, Sian Evans a’u staff, y Cynghorwyr Tref a’u staff am gydweithio i greu digwyddiad mor gofiadwy. Dymuna ddiolch yn arbennig hefyd i Edward Thomas a Peter Emms am fod yn Feistri'r Seremonïau ac i Elinor am agor y digwyddiad!

Diolch hefyd i Ambiwlans Sant Ioan a’r ddoli wedi’i llenwi ag aer(!), Nigel Williams am argraffu’r posteri a’r taflenni, y Neuadd Ddinesig am y cadeiriau a’r byrddau a’r person dweud ffortiwn; Captain Pugwash o RLNI(!) ac Andrew Evans am y generadur.

Diolch i G Hughes am y lluniau hyn, a gallwch weld mwy ar y wefan lle gallwch archebu copïau.
http://www.photoboxgallery.com/3003036

Cinio’r Maer
Daeth 115 o bobl i Ginio’r Maer yng Ngwesty’r Cawdor gan gynnwys gwesteion adnabyddus, y siaradwr William Wilkins CBE a’i wraig Lynne, y Cynghorydd Sir Tysul Evans a’i Gymar Delyth Dunsford, y Maer Charlotte Leadbeater a'i Chymar Tim ap Hywel, y cyd Gynghorydd a’r Maer ymadawol Edward Thomas, Clerc y Dref Roger Phillips a’i wraig Miriam, teulu, sef Demian, Lucy, Emily, Rhiwallon, a Thomas, ffrindiau, sef Rheolwr Theatr y Grand Gary Iles a’i wraig Mary, Nigel Lowson, Dirprwy Bennaeth Ysgol Ramadeg Caerwrangon a’i wraig Gilly a Meiri sefydliadau tref Llanymddyfri, Rhydaman a Glanaman.

Cafwyd datganiad hyfryd ar y delyn gan Mary Evans, ein telynores o gôr Cantorion San Teilo, wrth i ni dderbyn ein gwin pefriol cyn y pryd bwyd. Paratowyd y blodau gan Pinc a Susan Morgan-Jones y blodau ac argraffwyd y bwydlenni pinc hyfryd gan argraffwyr Nigel Thomas - ac fe’u llenwyd yn fedrus iawn gan y Maer ymadawol y Cyng Edward Thomas a’r Dirprwy Faer y Cyng Chris Parish.

Roedd awyrgylch hyfryd yn y cinio a thynnwyd lluniau o’r Meiri blaenorol a theulu a ffrindiau’r Maer newydd sef y Cyng Charlotte Leadbeater a’i gwr Tim ap Hywel.

Cynigwyd llwncdestun i’r Dref, y gwesteion, y cyd gynghorwyr, ac Ei Mawrhydi Y Frenhines, gan Roger Phillips, Clerc y Dref, a’r Cynghorwyr Ieuan Gwyn a Colin Jenkins.
Gwnaeth William Wilkins CBE araith arbennig gan ddweud ei fod wedi ‘dod gartref’ i’w filltir sgwâr a’i fod wrth ei fodd i gael Maer sydd hefyd yn artist. Siaradodd am adfywiad Llandeilo, y Neuadd Ddinesig, diwylliant Llandeilo, yr Eisteddfod, am ‘Ballet Russe Abertawe’, mynd â bale ledled y wlad, y gwyliau Cerddoriaeth a Blodau, a’r Synhwyrau. Canmolodd y Dref am godi cymaint o arian ar gyfer Elusennau - £23,700 eleni i Tenovus, a’r Cyngor Tref am eu gwaith caled a’r hysbysfyrddau newydd ar hanes Llandeilo.

Diolchodd y maer yn wresog iddo a rhoddodd ei haraith hi, gan ei longyfarch ar ei brosiect celfyddydau byd-eang diweddaraf, sydd nawr yn ei bedwaredd flwyddyn, sef Artes Mundi, yng Nghaerdydd.

Rhoddodd hefyd fanylion ein digwyddiad mawr nesaf - ‘Miri yn y Parc’ Ddydd Sadwrn 20 Mehefin.

Darparodd staff a chogyddion Gwesty’r Cawdor bryd o fwyd hyfryd i bawb, wedi ei weini’n brydlon ac yn effeithlon. Mae’r maer yn mwynhau ei dyletswyddau ac yn gobeithio gwasanaethu’r Dref a’i Chyd Gynghorwyr hyd eithaf ei gallu. Hoffai ddiolch i bawb am yr holl gardiau a negeseuon hyfryd.

Y Cyng Charlotte Leadbeater

Cymdeithas Y Dalar
Ar 22 Chwefror 2009 trefnodd Cymdeithas y Dalar arddangosfa yn Neuadd Ddinesig Llandeilo o’r enw Rhandiroedd: y Gorffennol, y Presennol a’r Dyfodol. Ar ôl areithiau gwadd gan gynrychiolwyr o’r Gymdeithas Genedlaethol i Arddwyr Rhandiroedd a Garddwyr Hamdden, Ffermydd Dinesig a’r Ymddiriedolaeth Genedlaethol, cafodd yr arddangosfa ei hagor yn swyddogol gan Edward Thomas, Maer Llandeilo, trwy dorri darn o dâp coch yn symbolaidd. Daeth llawer o bobl i’r arddangosfa ac ymhlith yr ymwelwyr roedd y tair ysgol gynradd leol. Bydd y Gymdeithas yn dechrau gwaith cyn bo hir ar y rhandiroedd newydd yn Home Farm Dinefwr ac mae’r Cyngor Tref yn teimlo’n sicr y bydd y fenter yn llwyddiant mawr.

Y Maer Edward Thomas yn agor yr arddangosfa yn y Neuadd Ddinesig

Medi 2008

Treialon Cwn Defaid y Byd ym Mharc Dinefwr

Roedd Treialon Cwn Defaid y Byd (www.worldsheepdogtrials.org/new/index.php), a gynhaliwyd ym Mharc Dinefwr, yn llwyddiant mawr, gyda’r tywydd yn gwella’n ddyddiol a miloedd o bobl yn mwynhau’r achlysur.
Ar Nos Fercher wlyb iawn, trodd tyrfa fawr allan i gyfarch yr Orymdaith Groeso, gyda band y Ffiwsilwyr Brenhinol Cymreig (www.royalwelshband.com), Siencyn yr afr, a gwaywyr ar gefn ceffylau yn arwain y cystadleuwyr gyda’u cwn defaid.
Codwyd baneri’r holl wledydd ar Heol Rhosmaen, ac anogwyd plant yr ysgolion lleol i baratoi baneri bach i’w chwifio at yr orymdaith.
Darparodd Cyngor Tref Llandeilo Dderbyniad, yn cynnwys bwffe, ar gyfer y cystadleuwyr yn y Neuadd Ddinesig. Croesawodd y Maer y gwesteion, a chyflwynodd blatiau dathliadol y Dref i gynrychiolydd o bob gwlad.
Roedd yr holl gystadleuwyr a’r trefnwyr wrth eu boddau gyda’r croeso cynnes a gawsant i Landeilo. Fe wnaeth llawer o’r ymwelwyr fwynhau’r Ffair Wledig a Bwyd, gyda digonedd o fwyd da a nwyddau o ansawdd uchel ar werth gan fusnesau lleol.
Yn goron ar y cyfan, tîm Cymru enillodd y gystadleuaeth gyffredinol, a daeth Aled Owen yn Bencampwr y Byd am y 3 blynedd nesaf.

Pen y Dudalen